مجلة النجوم – سيدني

بقلم – مايا إبراهيم

كنت كلّ ما تشوفني تضلّ غامرني وما تشيل إيدك عن خصري تغمرني بفخر وهالشي كان كتيرررر يعنيلي تقول هيدي ال légende اللي شاغلة ال social media فيا ما تشوفووا بتكتب قوافي تحرّري من قوافيكي وخلّينا نقرّب أكتر من روحك اللي مخبّاية بجعبتا كتيررر أشيا ، وأنا اليوم بدّي قلّك لوين يا مروان نجّار ؟ شو كبير بقلمك وبألمك شو جبّار !! سكت الورق لو سمحت ما تترك باب قلعة الكتابة مفتوح بيتسلّلو الاقلام المزيّفة والمتعدّايين عالكار وشو صارو كتار وعم يكتبو بإستهتار ،… ما بتليق فيك كلمة وداع ولا بيليق فيك رحلت ذات صباح منقلّك سلّم على أمتالك الكبار ، إنتو عم بتروحو بس ما عم بيعبّي حدا مطرحكن عم تضجر بلا روحكن المبدعة الاحجار ، اللي طالبين القرب كتار بس بصراحة نحنا متل إم الصبي ما بيعجبنا العجب بدّنا المتفوّقون وكلّ شي يكون عالبيكار ، بس شو بدّنا نعمل هيدي الحياة كلّنا فيا زوّار ما بين رحلة العمر ومدى العمر شويّة تفاصيل وسلسلة مفقودين بيناتن فارس إبن إمّ فارس يعني عم تسكت شويّ شويّ بيوت من أحلى بيوت راس بيروت ، ومع هيك لازم نقبل إنّو هالحياة بكلّ بيت راح يكون في لمحة حبّ ويعيشو ب ثبات ونبات وفي مواسم خير وحصاد المواسم بيتوسّطن حلم آذار ، بس إلنا عندك طلب ورجا وصّل بس السلام ما توصّل آخر الأخبار ولا تقلّن الوضع ع صوص ونقطة راح يزعلو إذا عرفو بغيابن لعب الفار خلّين مرتاحين بهاك الدار.

رابط مختصر: