Sam Nan
مجلة النجوم – سيدني
بقلم الشاعر فؤاد نعمان الخوري
أهلي هونيك
تذكّرتَك عَ صياح الدّيكْ
لْبست التوبِه وعم نادِيكْ:
أهلي بالجنّه الموعُودِهْ
بوابُن ودروبُن مسدودِهْ…
سلّمتَك أهلي هونيكْ!
،،،،
لمّا خْلقت بحضن البردْ
لفُّو المغاره بالوردْ،
ضوُّو طلاّتَك عَ الجردْ،
فتحُو للَّيل شبابيكْ..
لا تترك أهلي هونيكْ!
،،،،،
سهرُو وشربُو كاس العيدْ
قالُو: بعدُو الخوف بعيدْ…
وعام جديد، وهمّ جديدْ:
يا الله، الله يخلّيكْ،
عينَك عا أهلي هونيكْ!
،،،،،
الغيمه السودا عا التلاّتْ،
عا الطرقات وبالساحاتْ،
بكل شي قْلنا، بكل شي عْملنا..
ولمّا بحالتنا تأمّلنا
ما تأمّلنا الاّ فيكْ…
سلّمتَك أهلي هونيكْ!
رابط مختصر: https://anoujoum.com.au/?p=17953
